शेअर ट्रेडिंगच्या आमिषाने कुलाब्यातील व्यावसायिकाला ४.९२ कोटींचा गंडा

मुंबई : ऑनलाइन शेअर ट्रेडिंगमधून मोठ्या नफ्याचे आमिष दाखवून सायबर गुन्हेगारांनी कुलाब्यातील एका ५६ वर्षीय पर्यटन व्यावसायिकाची तब्बल ४.९२ कोटी रुपयांची फसवणूक केली. विश्वास बसावा म्हणून त्यांनी सुरुवातीला २.९७ लाख रुपयांचा कथित नफा त्यांना काढू दिला होता, असे पोलिसांनी सांगितले. या प्रकरणी दक्षिण विभाग सायबर पोलिसांनी फसवणूक, बनावटगिरी आणि तोतयागिरीसह माहिती तंत्रज्ञान कायद्यातील तरतुदींनुसार गुन्हा दाखल केला आहे.

पोलिसांच्या माहितीनुसार, तक्रारदार कुलाब्यात टूर आणि ट्रॅव्हल एजन्सी चालवतात. म्युच्युअल फंड आणि एसआयपीमध्ये गुंतवणूक करणाऱ्या या व्यावसायिकांना शेअर बाजाराचा अनुभव नव्हता. १० ऑगस्ट रोजी समाजमाध्यमावर शेअर ट्रेडिंगची जाहिरात पाहून त्यांनी एक अर्ज भरला. त्यानंतर एका महिलेने त्यांच्याशी संपर्क साधून गुंतवणुकीच्या टिप्स देणाऱ्या व्हॉट्सॲप ग्रुपमध्ये त्यांना सामील करून घेतले.

१७ ऑगस्टला त्याच महिलेने त्यांना एक ट्रेडिंग ॲप डाउनलोड करायला लावले. प्रत्येक गुंतवणुकीसाठी ॲपवर बँक खाते क्रमांक दिला जात होता आणि त्यात आरटीजीएस किंवा एनईएफटीने पैसे भरल्यावर ॲपमधील पोर्टफोलिओ नफ्यात दिसत होता. २७ सप्टेंबरपर्यंत त्यांनी सुमारे ४.९२ कोटी रुपये भरले. दरम्यान, १७ सप्टेंबरला २.९७ लाख रुपये काढण्याची विनंती मान्य झाल्याने त्यांचा विश्वास आणखी वाढला आणि त्यांनी आपल्या ४८ वर्षीय कर्मचाऱ्यालाही याच ॲपमध्ये गुंतवणूक करायला सांगितले. त्या कर्मचाऱ्याचे सुमारे १० लाख रुपये अडकले.

पुढे पैसे काढण्याच्या विनंत्या वारंवार नाकारल्या गेल्या. विचारणा केल्यावर, तुम्ही आयपीओमध्ये गुंतवणूक केली असून पैसे काढण्यासाठी आणखी रक्कम भरावी लागेल, असे सांगण्यात आले. संशय आल्याने त्यांनी सायबर हेल्पलाइनवर तक्रार केली आणि ती पुढे दक्षिण विभाग सायबर पोलिसांकडे वर्ग झाली. अनोळखी जाहिराती आणि व्हॉट्सॲप ग्रुपमधील गुंतवणुकीच्या सल्ल्यांपासून सावध राहावे आणि फसवणूक झाल्यास तातडीने सायबर हेल्पलाइनवर संपर्क साधावा, असे आवाहन पोलीस वारंवार करतात.

माहिती स्रोत: हिंदुस्तान टाइम्स