वसई-विरारमध्ये सर्पदंशाचे वाढते प्रमाण; २१ महिन्यांत ५७१ रुग्ण

वसई : वसई-विरार परिसरात सर्पदंशाच्या घटना चिंताजनक प्रमाणात वाढल्या आहेत. २०२५ पासून सप्टेंबर २०२६ पर्यंतच्या सुमारे पावणेदोन वर्षांत शहरी भागात ३६६ आणि ग्रामीण भागात २०५ अशा एकूण ५७१ जणांना साप चावल्याची नोंद झाल्याचे आरोग्य विभागाने सांगितले.

कापणीचा हंगाम, वाढती उष्णता आणि इमारती व प्रकल्पांसाठी होणारी जंगलतोड यामुळे सापांचा अधिवास धोक्यात आला असून ते अन्न आणि आसऱ्याच्या शोधात नागरी वस्त्यांपर्यंत पोहोचत आहेत. परिसरात आढळणाऱ्या सापांमध्ये नाग, घोणस, मण्यार आणि फुरसे या विषारी जातींचा समावेश आहे. शेतात किंवा अडगळीच्या जागी काम करताना नकळत सापावर पाय पडल्याने दंश झाल्याच्या घटना अलीकडे वाढल्या आहेत.

गेल्या दोन महिन्यांत सर्पदंशामुळे तीन महिलांचा मृत्यू झाला आहे. विरारच्या आगाशी परिसरात ७ ऑक्टोबर रोजी स्वयंपाकघरात दंश झालेल्या एका महिलेचा उपचारादरम्यान मृत्यू झाला. त्याआधी सप्टेंबरमध्ये वसई पूर्वेत झोपेत असताना, तर ऑगस्टमध्ये विरार पूर्वेत शेतात काम करताना दंश होऊन दोन महिलांचा मृत्यू झाला होता.

वेळेत उपचार न मिळाल्याने किंवा दंश झाल्याचे लक्षातच न आल्याने रुग्ण दगावण्याच्या घटना घडतात. त्यामुळे महापालिकेची रुग्णालये आणि प्राथमिक आरोग्य केंद्रांत प्रतिसर्पविष लस उपलब्ध करून देण्यात आली असून, दंश झाल्यास तातडीने तेथे उपचार घ्यावेत, असे आवाहन महापालिकेने केले आहे. बंगले, इमारती, दुचाकी आणि अडगळीच्या खोल्यांमधूनही अलीकडे साप पकडावे लागले असून घरात आणि शेतात वावरताना काळजी घ्यावी, असे सर्पमित्र हेमंत पवार यांनी सांगितले.

माहिती स्रोत: लोकसत्ता