ससूनच्या मानसोपचार विभागात दररोज चार ते पाच तरुण; मानसिक आरोग्याचा प्रश्न गंभीर

पुणे : संवादाचा अभाव, नातेसंबंधांतील गुंतागुंत, वाढत्या अपेक्षांचे ओझे आणि मोबाईलचा अतिवापर यामुळे तरुणांमध्ये नैराश्यापासून आत्महत्येच्या प्रयत्नांपर्यंतच्या समस्या वाढत असल्याचे ससून रुग्णालयातील आकडेवारीतून दिसते. आत्महत्येचा प्रयत्न केलेल्या चार ते पाच रुग्णांना दररोज इतर विभागांतून मानसोपचार विभागाकडे पाठवले जाते. यातील बहुतेक रुग्ण १५ ते ३० वयोगटातील असून तरुणींचे प्रमाण तुलनेने अधिक आहे, अशी माहिती विभागप्रमुख डॉ. निशिकांत थोरात यांनी दिली.

विभागाच्या बाह्यरुग्ण विभागात गेल्या वर्षी सुमारे ५२ हजार रुग्णांनी उपचार घेतले. चालू वर्षी एप्रिल ते सप्टेंबरदरम्यानच हा आकडा सुमारे ३६ हजारांवर पोहोचला असून दररोज १५० ते २०० रुग्ण येतात. स्किझोफ्रेनिया, बायपोलर डिसऑर्डर आणि नैराश्यासारख्या आजारांबरोबरच मुलांमधील चिडचिड, एकाग्रतेचा अभाव आणि मोबाईल-समाजमाध्यमांच्या अतिवापरातून आलेल्या वर्तणुकीच्या समस्याही दिसत आहेत.

प्रेमसंबंधांतील तणाव, कौटुंबिक समस्या आणि परीक्षेचा ताण ही प्रमुख कारणे असून काही प्रकरणांत व्यसनाधीनतेचाही संबंध दिसतो, असे डॉ. थोरात यांनी सांगितले. दर महिन्याला अशा १० ते १२ रुग्णांना दाखल करून उपचार करावे लागतात. रुग्णाची स्थिती आणि कौटुंबिक आधार यांचा आढावा घेऊन औषधोपचार आणि समुपदेशन केले जाते.

बाह्यरुग्ण विभागात येणाऱ्यांपैकी सुमारे ४० टक्के रुग्ण धाराशिव, बीड, अहिल्यानगरसारख्या बाहेरील जिल्ह्यांतून येतात. वैद्यकीय विद्यार्थ्यांसाठी रुग्णालयाने ‘छात्र मानस कक्ष’ सुरू केला असून तेथे दररोज चार ते पाच विद्यार्थ्यांचे समुपदेशन होते. मुलांमधील वर्तणुकीच्या समस्या आणि भावनिक अस्थिरतेकडेही वेळीच लक्ष देण्याची गरज मानसोपचारतज्ज्ञांनी व्यक्त केली.

माहिती स्रोत: पुढारी